Føroyar, Bretland, Ísland og Noreg eru komin ásamt um at býta makrel. Sostatt legst Ísland afturat semjuni, sum Føroyar, Bretland og Noreg gjørdu í 2024.

Føroyski luturin óbroyttur

Sambært nýggju semjuni er føroyski parturin frá semjuni við Bretland og Noreg um makrel frá 2024 óbroyttur. Tað merkir, at hann framhaldandi verður 12% av mest loyvdu veiðu. Somuleiðis er føroyska atgongdin í bretskan sjógv á 35% og í norskan sjógv á 40% óbroytt.

Lata Íslandi atgongd

Tey fýra strandarlondini eru samstundis samd um, at mest loyvda veiða í 2026 verður 299.010 tons. Hetta merkir, at mest loyvda veiða í 2026 lækkar 48% samanborið við 2025. 

Við nýggju makrelsemjuni lata Føroyar Íslandi atgongd til føroyskan sjógv at fiska makrel. Hendan atgongdin svarar til 30% av íslendska lutinum á 10,5%.