Hósdagin undirskrivaðu Føroyar og Grønland fiskiveiðuavtaluna fyri 2014 eftir samráðingar í Keypmannahavn í tveir dagar.

 

Stórvegis broytingar eru ikki í avtaluni. Grønlendska sildakvotan í Føroyskum sjógvi hækkar 50 tons, og grønlendsk nótaskip fáa atgongd til at fiska upp til 5.000 tons av teirra svartkjaftakvotu í føroyskum sjógvi. Føroyar fáa 100 tons av toski afturat í Eysturgrønlandi.

 

Avtalan við Grønland er ikki stór. Umframt sildina og atgongdina til at fiska svartkjaft í okkara sjógvi, kunnu grønlendsk línuskip royna 60 dagar undir Føroyum.

 

Føroysk skipa eiga í 2014 355 tons av toski og 275 tons av svartkalva í Eysturgrønland, umframt 100 tons av svartkalva í Vesturgrønlandi. Harumframt kunnu føroysk rækjuskip fiska 100 tons av rækjum í royndarfiskiskapi á teimum norðaru leiðunum í Eysturgrønlandi.